ALKIMISTI

Alkimia është ndër shkencat me të vjetra, që ka bërë mrekullitë e botës. Ajo ka shpikur gurin e mrekullisë, i cili i ka shndërruar gjithë sendet në ar

 e margaritarë.

Akademik Nexhat Daci është një alkimist i famshëm, që ka marrë shumë medalje të arta për zbulimet alkimike. Ai ka shpikur edhe shumë formula të reja magjike e politike. Çudi, si e ka harruar deri sot Nobeli!

Pas lojës 12-vjeçare cicmic me Akademinë e Shkencave dhe të Arteve të Kosovës,  Daci kishte kërcyer tap-rrap nga pullazi i Akademisë në kulmin e Parlamentit të Kosovës.

Daci është i lindur për alkiminë e bashkëdyzimeve politike. 

Ai di ta luajë mirë lojën Maca-mini!

KOALICIONI

Pas takimit kokë më kokë në kabinetin e bardhë, kryeparlamentari i  kishte thënë kryeministrit

Vetëm Zoti mund ta prish koalicionin tonë qeveritar. Koalicioni i palëkundshëm do të ketë edhe mbështetjen te krijuesi mëshirues dhe bamirës Zoti, të cilit i falemi të gjithë…

Kryeministri ishte lumturuar shumë për këtë bajram të vogël.

Natyrisht, Zoti ka fuqi të madhe për mbështetje dhe ndëshkim.

Mirëpo, në qoftë se luan bisht Daci, koaliconi mund të shembet dhe t’i zërë së bashku dacin e macin.

NË DET

Kryeparlamentari Daci kishte rënë në det mu Ditën e verës, kur detarët po ngrinin velat, ndërsa kopshtarët kishin dalë nëpër ullishta. Daci ishte frymëzuar shumë nga deti, duke u bërë edhe poet metaforik:

Asnjë erë nuk do ta pengojë anijen e Kosovës të arrijë limanin e saj. 

Akademiku i kimisë ishte bërë edhe historian i famshëm:

Historia për të gjithë ne ishte e tillë çfarë ishte dhe nuk mund ta ndërrojmë e as ta korrigjojmë atë. 

Edhe kryepari i Ulqinit ishte ngazëllyer shumë :

Kosovarët janë të mirëpritur gjithmonë në Ulqin, i cili është i njohur për detin dhe ullinjtë, që janë simbole të paqes. 

Gjatë drekës me peshk e verë të kuqe të dy liderët ishin marrë vesh për binjakëzimin e Preshevës dhe të Ulqinit, këto dy bonjare tona  që mbetën në  Sllavi.

REBELIMI I PARË

Një ditë edhe Daci  ishte rebeluar si kacagjel në UNMIK-un se po ia hante përsheshin:

Disa departamente të UNMIK-ut do të donin ndoshta që edhe një shekull të qëndrojnë këtu. Pse ta lëshojnë ata Kosovën? Rrogat e tyre janë aq të larta çfarë nuk janë në vendet e tyre… Ne kemi vajza të bukura, restorante ndoshta më të mirat në regjion.

Një zonjushë jona ishte lënduar shumë, duke e quajtur Dacin hiç më pak se Narcis, si imitues i zbetë i Titos, me t’i veshur kostumet e bardha, apo prej reklamuesi të zjarrtë i “ United Colors of Benetton”, me t’i veshur bluzat pembe, të verdha apo xhemperët fosfor gjelbër, e i ulur mbi mobiliet e bardha të lëkurës…

Bota e kishte komentuar këtë fenomen si kompleks frojdian.

MAHIA

Një ditë UNMIK-u përgënjeshtroi Dacin se Holkeri paska dhënë pëlqimin për ndërrimin e Kornizës kushtetuese.

Kanë mundur t’i thonë pakëz më butë: pse po mahitesh, baci Dac!  

Një herë tjetër Daci ishte zënë gafil:

Në Vjenë do të shkojmë o të gjithë bashkë, o hiç.

Mirëpo, Daci e kishte luajtur bishtin dhe ishte bërë Dyshi.

Surroi kishte thënë se Daci tash nuk shet tenxhere Zepter,por mjegull! 

Uh, yh,  çfarë rrene!

Daci nuk e kishte zier mirë rrenën në Zepter. 

LIGJËRATA

Përditë e më shumë Dacit po i hyn vetja në qejf. Çdo mëngjes këqyret në pasqyrë, lëmon frizurën gri e merr poza si të shkëlqejë më bukur në sallën ovale.  

Ngrefoset e kapardiset, vardiset e kreshpërohet kacagjelthi: 

Daci ka tepër shumë shkollë. Daci ka tepër shumë medalje akademike, jo vetëm të brendshme, por edhe të jashtme. Çdo fjalë e Dacit është platformë, është program …Unë diskutoj për rezultatin vetëm pasi ta shoh atë. Unë sendet i perceptoj me milimetër. Jam shkencëtar në institucione.

Unë vazhdimisht eci shumë ngadalë, por as nuk stagnoj e as nuk tërhiqem prapa. Kur them se jam i pagabueshëm, e bëj me qëllim, sepse dua t’i provokoj proceset.

Unë e di saktësisht kur duhet të veproj. Nuk jam as mendjemadh, as i kompleksuar. Do të vazhdojë në këtë mënyrë, sepse kështu do të mbahem mend më gjatë. Tash jam Dyshi, por nesër mund të bëhem Njëshi i Kosovës.

Natën e Vitit të Ri 2001 vetë Hakerupi  është kthyer të përshëndetet me ne dhe më ka ofruar vendin e presidentit të Kosovës, në praninë edhe të vetë Presidentit aktual.

Gazetarët e disa analistë nuk mund të më mbajnë leksione.Koka ime vlen më shumë se një tender.

Heu, unë Dac Baci, mbret i minjve e maceve!

Ehe-he, hë-hë, hi-hi!

Unë alkimisti Zepter, që prarova guralecët magjikë!

LABORATORI

Pas deklaratës së Solanës se disa njerëz të partive politike qëndronin pas protestave të marsit, Daci kishte deklaruar në Prizren :  

Unë jam shkencëtar dhe pa pasur analizat laboratorike nuk mund të them asgjë lidhur me këtë deklaratë.

Ndërsa duke u kthyer u garantoi shtimjanëve:

 Anija e quajtur Kosovë, me gjithë valët që nuk i janë dashur, lundron kah limani i saj i sigurt që quhet pavarësi...

Shtimjanët u gëzuan shumë dhe shkuan t’i presin biletat e para për në det. 

PLAFI

Gjatë përurimit të sallës ovale të Kuvendit, Daci qe përbetuar:

Institucionet e Kosovës nuk janë të gatshme ta fshijnë historinë shqiptare në Kosovë dhe nuk jemi të gatshëm të bëjmë inzhinierig me kulturën e traditën tonë, e cila është pranuar edhe ndërkombëtarisht.

Mirëpo, Daci luajti bisht menjëherë pas takimit me Solanën e Patenin, duke mbuluar me plaf  muralet historike të Kuvendit.

Mënjëherë edhe Qosja kishte hedhur hijen e dyshimit: 

Kush mund t’i sigurojë qytetarët e Kosovës se një njeri i tillë, për të shpëtuar veten në kiç-karrigen në të cilën humbet kur ulet, nuk do të mbulonte nesër me suva, me pëlhurë a me ngjyrë të zezë edhe pavarësinë e Kosovës!?

Daci luhatej ende në karrigen e lartë, praruar krejt me ar.

NË BREZARE

Në pikë të dimrit Daci kishte dalë në Brezare për ta përuruar vilën e tenderit. E kishte bërë sefte me pritjen e ambasadorëve grekë e italianë në Beligrad.

Daci ishte veshur sport. Salloni ishte i bardhë si bora, ndërsa Daci vezullonte si vezë e argjendtë.

Atmosfera ishte e këndshme, meqë pikëpamjet e tyre puthiteteshin si pëllumbat në borë.

PROFECIA

Mot i Ri  kishte ardhur plot hijeshi. Të gjitha institucionet, ministritë e partitë kishin organizuar pritje për gazetarët, duke reklamuar bëmat e tyre politike. Gazetarët ishin kënaqur duke ngrënë, duke pirë e duke qeshur.

Vetëm Daci kishte bërë një  rrëshqitje. Kishe kërcyer gardhin për të rënë në Bashkësinë Islame, duke harruar se nuk ishte as ramazan, as Bajram!

Aty kishte mbajtur një ders politik:

Ne i kemi përmbushur standardet më mirë se 50 për qind e dynjasë.

Ne kemi një sistem të mirë koalicioni, që do të mund të merrte vendime kompetente për çështje fundamentale dhe frikësohem se këtë nuk do ta kemi pas zgjedhjeve të ardhshme.

Mendoj se këto zgjedhje do ta sjellin Serbinë në kufijtë që meriton. Është vazhdimësi e asaj politike që i ka reduktuar mjaft kufijtë e Serbisë, e shpresoj se do të kenë fat të çlirohen edhe Vojvodina dhe Novi Pazari. 

Ajme, çfarë profecie alkimike!

VIP-BIP

Kronikat shkruajnë se Daci ka blerë veturën superluluksoze Ford excursion VIP 2005, me çmim të liruar në treg 236.500 euro.

Sikur të peshoheshin eurot në njërën anë dhe Daci këmbë e krye në anën tjetër, të parat do t’ia merrnin anën.

Kronikat thonë se makina është e blinduar në nivelin më të lartë të standardeve ndërkombëtare .

Ky mall është blerë për nevojat fiziologjike dhe  për arsye të sigurisë emergjente të kryetarit të Kuvendit, për ta ruajtur nga breshri këtë ekzemplar të rrallë në botë.

Sot për sot kjo është mburoja më e sigurt për ithën e Dacit dhe për ekskursionet e tij deri në vilën e tenderit në Brezare.

Thonë se Daci ka nisur edhe Qendrën Protokollare në Gërmi, me vlerë 3.303.665 euro. Kjo qendër madhështore do ta hijeshojë tërë hapësirën e blertë të Kosovës dhe do të shërbejë për relaksim të deputetëve në orët e lira. Aty do të luhet loja maca-mini.

Daci ka veshur edhe tërë Parlamentin me pasqyra, për të parë më bukur veten duke ardhur me Ford excursion VIP 2005.

Daci dredh mustaqet:

Luaja Dac,luaja! VIP-BIP!

DEMONSTRATA

Tërë Tërnoci është çuar në këmbë dhe kërkon me ngulm Birin e vet të madh.  Është hedhur në demonstrata të fuqishme, ndërsa disa  pleq më radikalë kanë shpallur grevë urie deri në vdekje.

Oh Zot, e kërkojnë me qiri e me pishë, gjallë a vdekur:

Daci është Biri ynë. Këtu ka luajtur së pari guralecë, fuzash e guxhas.

Ah, mësuesi ynë i parë i katundit! Të kërkojnë malet e varret, o Dac! Edhe macet mjaullijnë.

Qysh more Dac na ktheve shpinën, vera t’u bëftë dimën!

Ti Kosovën e çlirove, po Tërnocin e harrove.  

Dil një herë në Tërnoc, qysh na le kështu  në lloç!

Ti mrekullia hyjnore. Alkimisti i famshëm! Ah, P. Kyri ynë! Ave Maria Kyri! Oh Justiniani ynë nga Tauresi!

Thonë se je bërë poet magjik:  me kryet e Platonit, zërin e Orfeut dhe gjuhën e Ciceronit.

Mjaft shkëlqeve nëpër botë. Kujto një herë Çajupin:

Mjaft punove për të tjerë,

      o  fat-keq

Kujto vëndë tek ke lerë

      dhe tek  heq.

Hajde Dac, more shoq, hipi Fordit dil në Tërnoc!

Merre, merre Akademinë, se mu këtu e ka selinë.

Hajde Dac në Tërnoc, të bajmë të parin në Bujanoc.

More Dac, moj Bukuri, lum Tërnoci që të ka Ty!

Ç’po këndon gjithë ky njeri: edhe këtu zien Zepteri.

Ty të pret, Dac, Nobeli!

THEQAFJA

Daci theu qafën në pikë të rrafshit. I erdhi si rrufeja për së kthjellëti kur ishte në delirin e vilës së tenderit në Brezare. Dikush tha se ishte rrokullisur nga Ford excursion VIP 2005. Aksident politik!

Partia i kishte dhënë ultimatum me dorëheqje. Daci ishte ngujuar atje dhe nuk dorëzohej për së gjalli. Dy këshilltarët i rrinin te koka. Ia rrëfenin të gjitha dhiaret politike. Ramush Tahiri qiste zjarr prej goje e sysh.

Daci sodiste zjarrin e oxhakut duke medituar:

Eh, politika qenka si zjarri: të pjek, po edhe të djeg. Zjarri i brendshëm qenka më përvëlues se zjarri në laborator. Ah, ky zjarri, pastrues i botës!  Çfarë ta bëka i yti, s’mund ta bëkan të tjerët. Si, ore, kryeziu ta mund kryebardhin! Mua alkimistin që bëra guralecët margaritarë!

Zineta ia fërkon ballin me ujë të akullt.

Shëndoshë kryet, njeri! Të kam thënë mos u ngrefos si kacagjel.                   Sa deputetëve ua ngulfate fjalën! Ani deshe të bëheshe edhe President!

Ku është alkimia jote magjike?Politika shkon e vjen. Rroftë Zepteri e tenderi!

Bota u shastis: Daci rrëshqiti si thiu në akull.Narcisi bëri vetëvrasje në pasqyrë. Rënie kryengulthi. Vdekje e rëndë politike. Kur bie një herë, nuk ngrihesh më dot.

Parlamentit i ka rënë hije e keqe. Macet mjaullijnë e minjtë ciasin.

Ka vdekur mbreti i tyre. Ata kanë shpallur shtatë ditë zie. 

Ndjesë pastë Alkimisti i famshëm!